İran və Qətər XİN Qəzza böhranının həlli üçün siyasi səyləri müzakirə ediblər

İran və Qətərin xarici işlər nazirləri Qəzza böhranının həlli və İsrailin Fələstində hərbi əməliyyatlarının dayandırılmasına yönəlmiş siyasi səyləri müzakirə ediblər.

"Operativ Media" xəbər verir ki, bu barədə "Tasnim" məlumat yayıb.

"Şənbə günü axşam İranın xarici işlər naziri Hüseyn Əmir Abdullahian və Qətərli həmkarı Şeyx Məhəmməd bin Əbdül Rəhman Əl Tani telefon danışığı zamanı son ikitərəfli məsələləri, o cümlədən Qəzza böhranı da daxil olmaqla, regional hadisələri müzakirə ediblər", - məlumatda qeyd edilib.

Hər iki yüksək rütbəli diplomat münasibətlərdə artan tendensiyanın davam etdirilməsi və ikitərəfli razılaşmaların həyata keçirilməsinin vacibliyini vurğulayıblar.

Onlar həmçinin Qəzza zolağında baş verən son hadisələr və böhrana son qoymaq üçün irəli sürülən təşəbbüslərdən danışıblar.

Tərəflər bunun üçün səylərin və siyasi ehtiyatlılığın gücləndirilməsinin vacibliyini vurğulayıblar.