"Ermənistan və Qətər də daxil olmaqla region ölkələrinin hakimiyyət orqanları ilə hərbi əlaqələrə dair bir sıra müzakirələr və görüşlər keçirilib".

"Operativ Media" xəbər verir ki, bu barədə İranın müdafiə naziri, briqada generalı Məhəmməd Rza Aştiani çərşənbə günü jurnalistlərə bildirib.

Onun sözlərinə görə, müzakirələr "müdafiə sahəsində əməkdaşlığın genişləndirilməsi üçün zəmin yaratmaq üçün nələr edilə bilər" mövzusuna yönəlib. O əlavə edib ki, belə yanaşma Türkiyə və Rusiya ilə aparılan müzakirələrdə də özünü göstərib.

General qeyd edib ki, İran son illərdə silah ixracını xeyli artırıb, çünki ölkə müdafiə sənayesi sahəsində özünü təmin etməyə nail olub.

General Məhəmməd Rza Aştiani bildirib ki, son iki ildə hərbi texnikanın ixracı 4-5 dəfə artıb.

"İnnovasiyalar və istehsal olunan silah növləri sayəsində bu rəqəm gələcəkdə daha da artacaq", - o əlavə edib.

Ölkənin müdafiə naziri deyib ki, İran hazırda pilotsuz təyyarələr üçün mühərrik istehsalında özünü təmin edir və ağır yük mühərriklərinin istehsalı üzərində işləyir.