FHN və AFAD mütəxəssislərinin iştirakı ilə növbəti təlim kursları keçirilib
Fövqəladə Hallar Nazirliyinin (FHN) Beynəlxalq axtarış-xilasetmə Dəstəsinin (BAXD) beynəlxalq humanitar əməliyyatlarda fəaliyyətinin genişləndirilməsi və Beynəlxalq Axtarış-Xilasetmə Məşvərət Qrupu (İNSARAG) sinifləndirməsinə hazırlanması üzrə tədbirlər çərçivəsində Türkiyə Respublikası Daxili İşlər Nazirliyinin Fəlakət və Təxirəsalınmaz Hallar Departamentinin (AFAD) mütəxəssislərinin iştirakı ilə Bakıda növbəti təlim kursları və məşq keçirilib.
"Operativ Media" xəbər verir ki, bu barədə FHN-nın mətbuat xidmətindən məlumat verilib.
FHN-in Akademiyasında keçirilən “Təlimin idarəetmə qrupu – EXCON”, “İNSARAG İdarəetmə sistemi – İCMS” kursları və “Zədələnmiş tikililərin stabilləşdirilməsi” üzrə məşqi AFAD-ın Fəlakətlərə müdaxilə departamentinin baş direktoru doktor Sadi Ergin və AFAD Axtarış-xilasetmə idarəsinin rəisi Kartal Muhçi yaxından izləyərək müvafiq tövsiyələrini veriblər.
Təlim kurslarında və məşqdə iştirak edən mütəxəssislər - AFAD-ın INSARAG və Milli axtarış-xilasetmə standartları üzrə işçi qrup rəhbəri Berkant Tahsin Ataay, INSARAG və Milli axtarış-xilasetmə standartları üzrə işçi qrupun üzvü, BAXD mentoru Haluk Önay Erten, INSARAG və Milli axtarış-xilasetmə standartları üzrə işçi qrupun üzvləri Ramazan Yerli və Murat Balcı təlimlərin hazırlanması və koordinasiyası sahəsində beynəlxalq təcrübə, əməliyyatlar üzrə idarəetmə sistemlərindən istifadə qaydaları və imkanları barədə təlim iştirakçılarına ətraflı məlumat veriblər. Təlimin məşq hissəsində isə axtarış-xilasetmə əməliyyatları zamanı zədələnmiş tikililərin stabilləşdirilməsi üsullarının tətbiqi ilə bağlı praktiki vərdişlərin aşılanması qarşıya qoyulan əsas məqsədlərdən olub.
Təlim üzrə fəaliyyətin təhlili aparılıb, kurslara və məşqə yekun vurulub. Bununla bağlı FHN-in Akademiyasında keçirilən tədbirdə əvvəlcə hər iki ölkənin Dövlət Himnləri səsləndirilib. Mərasimdə çıxış edənlər - AFAD-ın Fəlakətlərə müdaxilə departamentinin baş direktoru doktor Sadi Ergin və FHN-in Baş əməliyyat idarəsinin rəis müavini, nazirliyin Beynəlxalq Axtarış-xilasetmə Dəstəsinin rəhbəri, polkovnik Ələsgər Əliyev təlimin əhəmiyyətini vurğulamaqla yanaşı, beynəlxalq humanitar əməliyyatlara hazırlıq sahəsində birgə fəaliyyətin mühümlüyünü önə çəkərək bu sahədə əməkdaşlığın davam etdirilməsinin vacibliyini diqqətə çatdırıblar.
Təlim kurslarını uğurla başa vurmuş nazirliyin Beynəlxalq Axtarış-xilasetmə Dəstəsinin üzvlərinə müvafiq sertifikatlar təqdim olunub.
Təlim başa çatandan sonra xatirə şəkili çəkdirilib.
