ABŞ Yaponiya ilə birlikdə kosmosda nüvə silahı ilə bağlı qətnamə layihəsi hazırlayıb

ABŞ-nin BMT-dəki daimi nümayəndəsi Linda Tomas-Qrinfild təsdiqləyib ki, Vaşinqton və Tokio dünya təşkilatının Təhlükəsizlik Şurasına təqdim edilməsi üçün kosmosda nüvə silahının yerləşdirilməsinin qadağan olunmasını təsdiq edən qətnamə layihəsi hazırlayıb.

"Nüvə silahının Yer kürəsinin orbitinə hər hansı yerləşdirilməsi görünməmiş, təhlükəli və qəbuledilməz olardı. Ölkələr Kosmik Müqavilənin dördüncü maddəsinə uyğun olaraq öz öhdəliklərinə əməl etməlidirlər (Sözügedən maddə nüvə silahı da daxil olmaqla Yerin orbitinə kütləvi qırğın silahları olan hər hansı obyektin yerləşdirilməsini qadağan edir). Və biz hələ bu müqaviləyə qoşulmamış bütün ölkələri dərhal bunu etməyə çağırırıq. Bu gün mən elan edə bilərəm ki, ABŞ Yaponiya ilə birlikdə BMT Təhlükəsizlik Şurasına təqdim edilməsi üçün qətnamə layihəsi hazırlayıb. O, bu müqavilənin tərəflərinin əsas öhdəliklərini bir daha təsdiqləyir və üzv ölkələri Yer kürəsinin orbitində yerləşdirilmək üçün yaradılan nüvə silahı və ya hər hansı digər kütləvi qırğın silahlarını inkişaf etdirməməyə çağırır", - Tomas-Qrinfild BMT-də deyib.

Bundan əvvəl  "Bloomberg" xəbər verib ki, ABŞ, Amerika mətbuatında Rusiyanın peyk əleyhinə silahlar hazırlaması ilə bağlı yayılan iddialarla əlaqədar olaraq, kosmosda nüvə silahlarının yerləşdirilməsinə qarşı BMT Təhlükəsizlik Şurasına qətnamə layihəsi hazırlayır.