Aİ martın 21-22-də keçiriləcək sammitdə Ukrayna ilə üzvlük müzakirələrinə başlamayacaq

Martın 21-22-də keçiriləcək sammitdə Avropa İttifaqının (Aİ) dövlət və hökumət başçıları Ukrayna və Moldova ilə üzvlük danışıqlarına başlamaq üçün Avropa Komissiyasının təklif etdiyi təlimatları təsdiqləməyəcək. 

"Operativ Media" xəbər verir ki, bunu Aİ nümayəndəsi Brüsseldə jurnalistlərə bildirib.

"Bizim bir prosesimiz var və martda keçiriləcək Aİ sammiti danışıqların təlimatları ilə bağlı qərar verə bilməz. Hüquq xidmətlərinin Komissiyanın təklif etdiyi təlimatlara baxması lazımdır. Genişlənmə ilə bağlı hər şey 27 ölkənin hamısının yekdilliyini tələb edir", - deyə o, jurnalistlərin Aİ liderlərinin Ukrayna ilə danışıqlara başlamaq qərarına gəlib-gəlməyəcəyi ilə bağlı sualını cavablandırıb.

Diplomatın sözlərinə görə, Ukrayna və Moldova ilə danışıqlara başlamaq üçün Avropa Komissiyasının təklif etdiyi təlimatlar "yaxın aylar ərzində" təsdiqlənməlidir. Jurnalistlərin Ukrayna ilə bağlı qərarların qəbuluna mane olan Macarıstanın Aİ Şurasına altı aylıq sədrlik edəcəyi ilin ikinci yarısında bunu etmək daha çətin olacaqmı sualına diplomat belə cavab verib: "Xeyr. Mənim fikrimi soruşsanız, məncə, bunun əksi olacaq. Macarıstanın sədrlik dövründə etiraz etmək daha çətindir, çünki sədrin öhdəlikləri var və onları həll etməli olacaq".