Avropa Şurasının rəhbəri: Aİ çətin günlər yaşayır və ciddi çağırışlarla üzləşib

Avropa Şurasının rəhbəri Şarl Mişel hesab edir ki, Aİ çətin günlər yaşayır və ciddi çağırışlara cavab axtarışları ilə üz-üzədir.

"Operativ Media" xəbər verir ki, o, bu barədə Bolqarıstan, Hollandiya, İsveç və Çexiyadan olan yüksək vəzifəli şəxslərin Avropa Parlamentinə seçkilərdən sonra icmanın yeni siyasi dövrünün prioritetlərini müzakirə etmək üçün toplaşdığı Vilnüsdə jurnalistlərə bildirib.

"Bizi inanılmaz çətinliklər və çağırışlar gözləyir", - o etiraf edib: "Avropa İttifaqını gücləndirmək və təhlükəsizliyi təmin etmək üçün mümkün olan hər şeyi etmək lazımdır". 

Onun sözlərinə görə, Aİ Kiyevə yardımını qeyd-şərtsiz təsdiqləməlidir: "Biz lazım olduğu qədər Ukraynanı dəstəkləyəcəyik. Bunun üçün bütün mümkün maliyyə və hərbi resursları səfərbər edəcəyik, siyasi yardımdan istifadə edəcəyik". 

O, həmçinin yeni siyasi tsiklin prioritetləri sırasında Avropa iqtisadiyyatının gücləndirilməsini qeyd edib: "Vahid bazar bizim üçün çox vacibdir. Onu gücləndirmək və daha çox sərmayə qoymaq lazımdır".

Mişelin fikrincə, Avropa layihəsinin əsasının - demokratiya prinsiplərinin qorunub saxlanması da az əhəmiyyət kəsb etmir: "Biz vahid qalmalıyıq, layiqli qlobal güc olaraq qalmalıyıq".