Meksika hakimiyyəti Quitodakı Meksika səfirliyinə sığınan Ekvadorun keçmiş vitse-prezidenti Xorxe Qlasa siyasi sığınacaq vermək qərarına gəlib. 

"Operativ Media" xəbər verir ki, bu barədə Meksika Xarici İşlər Nazirliyinin yaydığı bəyanatda deyilir.

"Alınan məlumatların hərtərəfli təhlilindən sonra Meksika hökuməti hazırda Meksikanın Quitodakı səfirliyində yerləşən Xorxe David Qlas Espinelə siyasi sığınacaq vermək qərarına gəlib və bu barədə rəsmi olaraq Ekvador hakimiyyətinə məlumat veriləcək", - diplomatik departamentdən bildiriblər.

Ekvadorun keçmiş vitse-prezidenti korrupsiya işində ittiham olunur. Qlas artıq 2017-ci ildən 2022-ci ilə qədər həbsxanada cəza çəkib. Meksika Xarici İşlər Nazirliyi ötən ilin dekabrında bildirib ki, Qlas ölkənin Kitodakı səfirliyindən sığınacaq istəyib. Bundan sonra Ekvador hakimiyyəti Meksika diplomatik nümayəndəliyindən polisə Qlası həbs etməyə icazə verməsini istəyib, lakin onlar bundan imtina ediblər.