Şri-Lanka Xarici İşlər Nazirliyi BRİKS-ə qoşulmaq istəyini açıqlayıb

Şri-Lankanın xarici işlər naziri Əli Sabri ölkənin BRİKS-ə qoşulmaq planlarını təsdiqləyib.

"Operativ Media" xəbər verir ki, o, Şri-Lanka hökumətinin üzvlük məsələsini araşdırmaq üçün alt komitə təyin etdiyini açıqlayıb.

"BRİKS yaxşı təşkilatdır, xüsusən Hindistan da onun bir hissəsi olduğu üçün biz bu təşkilata qoşulmağa səy göstərəcəyik. İlk danışacağımız ölkə Hindistan olacaq və ondan BRİKS-ə qoşulma yolunda bizə dəstək olmasını istəyəcəyik”, - nazir deyib.

Qeyd edək ki, BRİKS qrupu 2006-cı ildə yarandığı gündən bu yana iki genişlənmə dalğasından keçib. 2011-ci ildə Cənubi Afrika Braziliya, Rusiya, Hindistan və Çinin də daxil olduğu orijinal siyahıya qoşulub. 2023-cü ilin avqustunda Argentina da daxil olmaqla altı yeni üzv dərnəyə dəvət edilib, lakin dekabrın sonunda assosiasiyaya qoşulmaqdan imtina edib. Beş yeni üzv (Misir, İran, BƏƏ, Səudiyyə Ərəbistanı və Efiopiya) 2024-cü il yanvarın 1-də BRİKS-də tam hüquqlu fəaliyyətə başlayıb.