Almaniya, Polşa və Fransa Moldovaya müdafiə qabiliyyətini gücləndirməyə kömək edəcək

Veymar üçbucağına daxil olan ölkələr (Almaniya, Polşa, Fransa) Moldovanın təhlükəsizliyini və müdafiə qabiliyyətini gücləndirmək üçün ona yardım göstərməyə razılaşıblar.

"Operativ Media" xəbər verir ki, müvafiq bəyanat Almaniya Xarici İşlər Nazirliyinin saytında dərc olunub.

"Ölkələr Moldovanın təhlükəsizliyini, müdafiəsini və xarici müdaxiləyə müqavimət göstərmək qabiliyyətini gücləndirmək, həmçinin ölkə üçün zəruri islahatları təşviq etmək barədə razılığa gəliblər", - mayın 17-də Parisdə respublikanın təhlükəsizlik məsələləri ilə bağlı qəbul edilmiş sənəddə deyilir.

Bundan əlavə, bəyanata görə, Veymar üçbucağı ölkənin iqtisadi inkişafını və Aİ-yə üzvlük prosesini, eləcə də Kişinyovun dezinformasiya kampaniyalarına qarşı mübarizəsini stimullaşdırmaq üçün maliyyə dəstəyi verəcək.

Veymar üçbucağı 1991-ci ilin avqustunda yaradılmış Almaniya, Polşa və Fransadan ibarət regional qrupdur. Onun məqsədi əməkdaşlığı inkişaf etdirmək və Varşavanı Aİ və NATO ilə yaxınlaşdırmaq idi.