Polşa Belarusla sərhəddə sərhədçilərə hücumların artdığını bildirib

Polşa Sərhəd Xidməti Belarusdan respublikaya qanunsuz daxil olmağa çalışan miqrantların hücumlarının artdığını bildirib.

"Operativ Media" xəbər verir ki, bu barədə idarədən bildirilib.

Qeyd edilib ki, hazırda onlar daş və çubuqlardan əlavə, pirotexniki vasitələrdən və sapandlardan daha fəal istifadə edirlər.

"Hasarın o biri tərəfində Polşa-Belarus sərhəddində olan miqrantlar tərəfindən aqressiv davranış hallarının sayı getdikcə artır. Xaricilər daş, budaq, bibər qazından istifadə edərək Polşa patrullarına və sərhəd mühafizə maşınlarına hücum edir", - Polşa sərhəd xidmətinin saytında dərc edilmiş bəyanatda qeyd olunur.

Agentlik həmçinin iki miqrantın Polşa ərazisinə hasardan keçərək daxil olduğunu, onlardan birinin sapandla atəş açdığını əks etdirən video yayımlayıb.

Polşa sərhəd mühafizə xidmətinin məlumatına görə, 2024-cü ilin əvvəlindən miqrantlar tərəfindən Belarusdan respublikaya qeyri-qanuni keçməyə 13 mindən çox cəhd qeydə alınıb.