ABŞ: İsrailin atəşkəs razılaşmasının şərtləri ilə razılaşacağına əminik

ABŞ administrasiyası əmindir ki, İsrail hakimiyyəti Qəzza zolağında tam atəşkəs imkanını nəzərdə tutan sazişin şərtləri ilə razılaşacaq. 

"Operativ Media" xəbər verir ki, bu barədə Dövlət Departamentinin mətbuat xidmətinin rəhbəri Metyu Miller brifinqdə bildirib.

Ona İsrail dövlətinin mayın 31-də ABŞ prezidenti Co Baydenin təfərrüatlarını təqdim etdiyi sazişin şərtlərinə razı olub-olmayacağı ilə bağlı sual verilib. Diplomatın cavabı belə olub: "Biz buna tam əminik. Bu, İsrailin təklifi idi. Aydındır ki, bu, onların ABŞ, Qətər və Misirlə - bu prosesdə vasitəçi rolunu oynayan üç ölkə ilə məsləhətləşərək hazırladıqları bir təklif idi. Təklif cümə axşamı günü axşam (30 may - red.) HƏMAS-a təqdim olunub".

Onun sözlərinə görə, Birləşmiş Ştatlar hərəkatın cümə günü (31 may - red.) dərc etdiyi bəyanatı görüb, lakin onlardan heç bir cavab alınmayıb. 

Miller etiraf edib ki, razılaşma İsrail hökumətinin üzvləri arasında fikir ayrılığına səbəb olacaq: "Biz gördük ki, İsrail hökumətinin bəzi üzvləri artıq buna qarşı çıxıblar. Bu təklif İsrailin uzunmüddətli təhlükəsizlik maraqlarına cavab verir".