KİV: Çexiyada terror təhlükəsi ilə əlaqədar hazırlıq artırılıb

Çexiya polisi mümkün terror aktı ilə bağlı məlumatlara görə bazar günü gecə ictimai yerlərdə təhlükəsizlik tədbirlərini gücləndirib. 

"Operativ Media" xəbər verir ki, bu barədə "İdnes" xəbər portalı mənbələrə istinadən məlumat yayıb.

Portalın məlumatına görə, vağzallarda, ictimai nəqliyyatda və ticarət mərkəzlərində təhlükəsizlik tədbirləri gücləndirilib. Polisə avtobus dayanacaqları və dəmiryol stansiyalarının yaxınlığında şübhəli şəxsləri diqqətlə izləmək tapşırılıb.

Çexiya Baş nazirinin birinci müavini və daxili işlər naziri Vit Rakuşan hüquq-mühafizə orqanlarının hazırda ani təhlükə barədə məlumatı olmadığını təsdiqləyib: "Mən təsdiq edə bilərəm ki, polis indi Çexiya sakinləri üçün profilaktik təhlükəsizlik tədbirləri görür, lakin polisin infrastruktur təhlükəsi barədə məlumatı yoxdur".

"Hazırda polis xaricdəki hücumlarla bağlı işi araşdırır. Şübhəli şəxs saxlanılıb, lakin buna baxmayaraq, ehtiyat tədbiri olaraq gücləndirilmiş təhlükəsizlik tədbirləri görülüb", - nazir daha sonra özünün "X" səhifəsində yazıb. Təfərrüatlar barədə bazar ertəsi Dövlət Təhlükəsizlik Şurasının iclasından sonra ictimaiyyətə məlumat veriləcək.

Bazar ertəsi Dövlət Təhlükəsizlik Şurasının iclası keçiriləcək.