Ərdoğan: Türkiyə ilə İspaniya münasibətləri bəzi NATO ölkələri üçün nümunədir

Türkiyə prezidenti Rəcəb Tayyib Ərdoğan ölkəsinin NATO-da İspaniya ilə tərəfdaşlığını bəzi alyans üzvü ölkələr üçün model adlandırıb. 

"Operativ Media" xəbər verir ki, o bu barədə Madriddə İspaniya hökumətinin başçısı Pedro Sançeslə danışıqlardan sonra bildirib. 

"2015-ci ildən bu günə qədər İspaniya ölkəmizdə yerləşdirdiyi "Patriot" hava hücumundan müdafiə sistemləri vasitəsilə həm müttəfiqi Türkiyənin təhlükəsizliyini, həm də NATO-nun kollektiv təhlükəsizliyini təmin edib. Öz adımdan və ölkəm adından ümid edirəm ki, bu töhfə bəzi digər NATO müttəfiqləri üçün də nümunə olacaq", - deyə Ərdoğan bildirib.

Onun sözlərinə görə, Madriddə keçirilən danışıqlarda ticarət-iqtisadi əlaqələrlə yanaşı, iki ölkə arasında hərbi-texniki sahədə əməkdaşlıq məsələləri də müzakirə edilib. Yerli media Ərdoğanın Madridə səfəri ərəfəsində Ankaranın Avropadan "Eurofighter" qırıcısının alınmasının danışıqların gündəmində olacağını yazıb. Həmin qırıcıların istehsalı üçün konsorsiuma daxil olan ölkələrdən biri də İspaniyadır.

"2021-ci ildə keçirilən əvvəlki Ankara sammitində əlaqələrimizi hərtərəfli tərəfdaşlığa yüksəltdik. İkitərəfli ticarətin növbəti hədəfi qarşıdakı beş ildə ticarət dövriyyəsini 25 milyard avroya çatdırmaqdır", - deyə Ərdoğan bildirib.