İtaliya sahillərində iki gəmi batıb, 11 nəfər ölüb, 60-dan çox insan itkin düşüb

İtaliyanın cənubu sahillərində iki gəminin batması nəticəsində azı 11 nəfər ölüb, 60-dan çox insan itkin düşüb.

"Operativ Media"nın məlumatına görə, Almaniyanın RESQSHIP xeyriyyə təşkilatı  batan taxta qayıqdan 51 nəfəri götürdüyünü və Lampeduza adasının yaxınlığında aşağı göyərtədə sıxılmış vəziyyətdə qalmış 10 cəsədi tapdığını bildirib.

Sərhədsiz Həkimlər (MSF) eyni gündə baş verən ayrı bir hadisədə 60-dan çox adamın itkin düşdüyünü, onlardan 26-nın uşaq olduğunu bildirib.

BMT agentlikləri bildiriblər ki, qayıqlarda Liviya və Türkiyədən gedən miqrantlar olub.

Lampeduza yaxınlığında qəzaya uğrayan gəmidən sağ qalanlar İtaliya sahil mühafizəsinə təhvil verilib.

BMT-nin Qaçqınlar üzrə Ali Komissarlığı UNHCR, Beynəlxalq Miqrasiya Təşkilatı (IOM) və BMT-nin Uşaq Təşkilatı UNICEF-in birgə bəyanatında gəminin Liviyadan yola düşdüyü və Suriya, Misir, Pakistan və Banqladeşdən olan mühacirləri daşıdığı bildirilib.

Agentliklərin bildirdiyinə görə, digər gəmi İtaliyanın cənubundakı Kalabriya sahillərindən təxminən 120 mil aralıda tapılıb.

İtaliyanın sahil mühafizəsi sağ qalan 12 nəfərdən birinin sahilə çıxdıqdan sonra öldüyünü bildirib.