Macarıstan Ruttenin NATO-nun baş katibi postuna namizədliyini dəstəkləyəcək

Macarıstan səlahiyyət müddəti oktyabrın 1-də başa çatacaq Yens Stoltenberqin yerinə NATO-nun yeni baş katibi vəzifəsinə Hollandiyanın baş naziri səlahiyyətlərini icra edən Mark Ruttenin namizədliyini dəstəkləyəcək.

"Operativ Media" xəbər verir ki, bu barədə iyunun 17-də Brüsseldə Avropa İttifaqının qeyri-rəsmi sammiti zamanı Rutte ilə görüşən Macarıstanın baş naziri Viktor Orban bildirib.

Macarıstan hökumətinin başçısı xatırladıb ki, o, əvvəllər Stoltenberqlə Macarıstanın NATO-nun Ukraynadakı missiyasında iştirak etməyəcəyi barədə razılığa gəlib: "Bu həftə növbəti addımımız bu razılaşmanın zamanın sınağından çıxacağına əmin olmaq idi. Dünən Brüsseldə keçirilən görüşdən sonra Baş nazir Mark Rutte təsdiqlədi ki, o, bu sazişi tam dəstəkləyir və əgər o, növbəti baş katib olarsa, eyni siyasəti davam etdirəcək. NATO vədinə əsasən, Macarıstan baş nazir Ruttenin NATO-nun baş katibi vəzifəsinə namizədliyini dəstəkləməyə hazırdır", - Orban öz "X" səhifəsində yazıb.