Fidan: Türkiyə və Rusiya Suriyada nizamlanma istiqamətində mühüm nəticələr əldə edib

Moskva və Ankara Suriya nizamlanmasında mühüm nəticələr əldə ediblər, lakin Suriyada başqa ölkələrin silahlı qüvvələrinin olması vəziyyəti çətinləşdirir. 

"Operativ Media" xəbər verir ki, bu fikirləri Türkiyənin xarici işlər naziri Hakan Fidan deyib.

"Bizim və Rusiya tərəfinin Suriyada əldə etdiyi ən mühüm şey odur ki, Suriya rejimi ilə müxalifət arasında davam edən müharibə artıq yoxdur. Məncə, bu, ən böyük nailiyyətdir", - Fidan Habertürk TV-yə açıqlamasında bildirib.

Onun fikrincə, nizamlanma perspektivləri nöqteyi-nəzərindən Suriyadakı ümumi vəziyyəti regionda Rusiya, İran, bir sıra silahlı qruplaşmaların olması və İsrailin mütəmadi olaraq bölgədə əməliyyatlar keçirməsi mürəkkəbləşdirir. 

"Mən dəfələrlə Rusiya tərəfi ilə görüşlər zamanı vurğulamışam ki, Suriya rejimi bu müddətdən müxaliflərlə müharibə etmədən, konstitusiya məsələlərini həll etmək, müxalifətlə barışmaq və milyonlarla qaçqını öz vətənlərinə qaytarmaq üçün ağıllı şəkildə istifadə etməlidir", - deyə Fidan bildirib. 

O əlavə edib ki, Rusiya bu kontekstdə addımlar atmalıdır, Suriya da bunu öz gələcəyi üçün etməlidir.

Xarici işlər naziri qeyd edib ki, hökumət və müxalifətin birləşmiş qüvvələri Suriyada hakimiyyətə gəlsələr, PKK-ya qarşı mübarizədə effektiv oyunçu ola biləcəklər: "PKK-nın Suriya qolları bu ölkənin şimalında Türkiyə ilə sərhədə yaxın ərazilərin bir hissəsinə nəzarət edir. Ankara bunu öz milli təhlükəsizliyinə təhdid hesab edir".