Arizonadakı Luke Hərbi Hava Qüvvələri bazasında danimarkalı pilotlara təlim keçmək üçün istifadə edilən TR-3 konfiqurasiyasında olan 6 ədəd F-35 döyüş təyyarəsi Danimarkaya göndəriləcək. Bu, Danimarka Hərbi Hava Qüvvələri üçün yeni F-35 qırıcılarının istehsalçısı tərəfindən gecikmələrin aradan qaldırılmasına kömək edəcək.

"Operativ Media" xəbər verir ki, bu barədə Krallığın Müdafiə Nazirliyi bildirir.

"Artıq yazda mən Silahlı Qüvvələrdən TR-3 konfiqurasiyasında yeni Danimarka F-35 qırıcılarının çatdırılması gecikdirilsə, mümkün həll yollarını nəzərdən keçirməyi xahiş etdim", - müdafiə naziri Troels Lund Poulsen bildirib.

İstehsalçı Lockheed Martin, Danimarka üçün F-35-in 2024-cü ilin iyul ayına qədər hazır olmasını planlaşdırmışdı, lakin sonradan gecikmə ola biləcəyini söyləyib.

"TR-3 konfiqurasiyasında olan F-35 qırıcıları TR-2 ilə müqayisədə texniki və proqram təminatını təkmilləşdirib", - deyə Müdafiə Nazirliyinin mətbuat xidmətindən bildirilib.