Qırğızıstan Türkiyəyə yaşayış icazəsi almaq üçün şərtləri sadələşdirməyi təklif edib

Qırğızıstan Türkiyəyə yaşayış icazəsi almaq üçün şərtləri sadələşdirməyi təklif edib.

"Operativ Media" 24.kg-ya istinadən xəbər verir ki, məsələ iki ölkənin xarici işlər nazirlərinin müavinləri Almaz İmanqaziyev və Yasin Ekrem Serim arasında konsulluq məsələləri ilə bağlı keçirilən görüşdə qaldırılıb.

Qırğızıstan Xarici İşlər Nazirliyinin mətbuat xidmətinin məlumatına görə, tərəflər Türkiyənin miqrasiya qanunvericiliyini pozmuş Qırğızıstan Respublikası vətəndaşları üçün miqrasiya amnistiyası üzrə pilot layihənin həyata keçirilməsi imkanlarını araşdırıblar.

Qırğızıstan həmçinin Türkiyəyə paritet əsasda iki dövlətin vətəndaşlarının ölkədə qalma icazələrinin qiymətinin aşağı salınmasını, həmçinin daxili pasportlardan istifadə etməklə qarşılıqlı səyahət imkanlarının nəzərdən keçirilməsini təklif edib.

Vətəndaşların hüquq və mənafelərinin müdafiəsi, onların hər iki ölkədə olmaları və işləmələri üçün əlverişli şəraitin yaradılması məsələləri müzakirə edilib, sürücülük vəsiqələrinin qarşılıqlı tanınması ilə bağlı sənəd layihələri də nəzərdən keçirilib.

Tərəflərin səlahiyyətli orqanlarına vaxtında məlumat verilməsi və tutulan, həbs edilmiş və ya məhkum edilmiş vətəndaşların konsulluq imkanlarının təmin edilməsi haqqında dövlətlər arasında Vyana və Konsulluq Konvensiyasının həyata keçirilməsi məsələləri də müzakirə mövzusu olub.