Bayden və Netanyahu HƏMAS ilə razılıq səylərini müzakirə edirlər

ABŞ Prezidenti Co Bayden İsrailin baş naziri Benyamin Netanyahu ilə Qəzza zolağında atəşkəs razılaşmasının əldə edilməsi səylərini müzakirə edib. 

"Operativ Media" xəbər verir ki, bu barədə Ağ Evin mətbuat xidmətinin yaydığı bəyanatda deyilir.

Məlumata görə, Bayden və Netanyahu telefon danışığı zamanı girovların azad edilməsini də əhatə edən atəşkəs razılaşmasına nail olmaq səylərini müzakirə ediblər və bu, BMT Təhlükəsizlik Şurası, Yeddilik Qrupu və dünya ölkələri tərəfindən dəstəklənib.

 Tərəflər HƏMAS hərəkatının reaksiyasına toxunublar. Bayden Netanyahunun ABŞ, Qətər və Misirdən olan vasitəçilərlə danışıqlar aparmaq üçün prosesin başlamasına icazə verməsi qərarını alqışlayıb.

Həmçinin Prezident və Baş nazir iyulun 15-də ABŞ-İsrail idarələrarası strateji məşvərət qrupunun növbəti iclasının keçirilməsi barədə razılığa gəliblər.