Numan Kurtulmuş NATO müttəfiqlərini İsrailin Qəzzaya təcavüzünü dayandırmağa çağırıb

"Türkiyə Qəzza zolağında böhranın həlli üçün NATO müttəfiqlərinin fəal səylərinə ümid edir". 

"Operativ Media" xəbər verir ki, bunu respublika parlamentinin spikeri Numan Kurtulmuş Vaşinqtonda Şimali Atlantika Alyansına üzv ölkələrin parlament başçılarının görüşündə deyib.

"Biz Binyamin Netanyahu hökumətinə "Bəsdir" deməklə NATO müttəfiqlərimizi İsrailin Qəzzaya təcavüzünü dayandırmağa çağırırıq", - Kurtulmuş qeyd edib.

Onun sözlərinə görə, NATO dünyanın ən güclü müdafiə təşkilatı kimi Qəzza zolağında baş verən humanitar fəlakətə göz yuma bilməz. Türkiyə Böyük Millət Məclisinin sədri vurğulayıb ki, bölgədəki qırğın mümkün qədər tez dayandırılmalıdır.

O, həmçinin Ukraynadakı münaqişənin sülh yolu ilə həllinin tərəfdarı olduğunu bildirib və Türkiyənin onun suverenliyini dəstəklədiyini qeyd edib.