Lavrov: Qurbanlarla bağlı BMT-də ikili standartlar var
"BMT Ukrayna və Qəzza zolağında mülki əhalinin itkiləri ilə bağlı ikili standartları rəhbər tutur".
"Operativ Media" xəbər verir ki, bunu Rusiyanın xarici işlər naziri Sergey Lavrov Təhlükəsizlik Şurasının iclaslarında sədr kimi iştirakından sonra BMT-də keçirdiyi mətbuat konfransında deyib.
"Biz Ukraynanın hərbi və hərbi enerji infrastrukturuna hücum etdikdə, raketlərdən biri beynəlxalq humanitar hüququ pozaraq, yaşayış obyektlərinin və sosial obyektlərin tam ortasında yerləşən Ukrayna zenit sistemi tərəfindən vuruldu. Bu raketin qalıqları Kiyevdəki Oxmatdyt uşaq xəstəxanasına düşdü və hadisə nəticəsində iki nəfər öldü, 20-yə yaxın insan müxtəlif dərəcəli bədən xəsarətləri aldı. Səhər dərhal BMT baş katibinin rəsmi nümayəndəsi Stefan Düjarrik Rusiyanı ittiham etdi. Baş katib bütün bunları dayandırmağı və sair tələb etdi", - Lavrov bildirib.
Eyni zamanda, nazir qeyd edib ki, BMT-nin baş katibi Antonio Quterreş oktyabrın 7-də baş vermiş terror aktlarından sonra Qəzzada xəstəxanalara hücum edilərkən, müxtəlif mənbələrə görə 80 nəfərin ölümü və bir neçə yüz nəfərin yaralanması ilə bağlı "uzun şərh" edib. Lavrovun sözlərinə görə, Quterreşin şərhindən bu zərbəni kimin vurduğu aydın olmur: "O, zərbələri pislədi, beynəlxalq humanitar hüququn bu cür pozulmasına yol verməməyə çağırdı. Amma heç kim bu cinayəti kimin etdiyini başa düşmədi və ertəsi gün cənab Düjarrikdən məsələ ilə bağlı soruşulanda o, cavab vermədi. İkili standartlar göz qabağındadır", - Rusiya diplomatiyasının rəhbəri vurğulayıb.
