İran Trampın Qəzza danışıqlarına müdaxilə ilə bağlı açıqlamalarının əsassız olduğunu bildirib

İran Qəzza zolağında atəşkəsin yaradılması üzrə danışıqlar prosesinə təsir göstərməyə çalışmır.

Operativ Media xəbər verir ki, bunu İran İslam Respublikasının Xarici İşlər Nazirliyinin rəsmi nümayəndəsi İsmail Bəqayi deyib.

Onun sözlərinə görə, ABŞ Prezidenti Donald Trampın bunun əksinə yönəlmiş bəyanatları İsrail hakimiyyətinin hərəkətlərinə dəstək vermək məsuliyyətindən yayınmaq cəhdidir.

"İran İslam Respublikasının danışıqlar prosesinə müdaxiləsi ilə bağlı hər hansı bəyanatlar tamamilə əsassızdır və ABŞ-nin sionist rejimin Fələstin xalqına qarşı törətdiyi cinayətlərdə iştirakına görə məsuliyyətdən yayınmaq cəhdini əks etdirir. Qadınlar və uşaqlar da daxil olmaqla 60 min günahsız insanın qətli, Qəzzaya humanitar yardımın son aylarda daha da məhdudlaşdırılması, anklav sakinləri üçün göndərişlərin dayandırılması, Amerika şirkəti tərəfindən yaradılmış yardım paylama məntəqələrində qurulmuş ölüm tələləri nəticəsində ac və susuz insanların qətlə yetirilməsi buna misaldır", – deyə diplomat qeyd edib.

İran rəsmisi əlavə edib ki, İslam Respublikası dünyanın əksər ölkələri kimi Qəzza zolağında baş verən soyqırımı qətiyyətlə pisləyir və hərbi əməliyyatların dayandırılmasına, anklavda fələstinlilərin vəziyyətinin yaxşılaşdırılmasına xidmət edən istənilən təşəbbüsü dəstəkləyir.