Tailand Kamboca ilə münaqişənin iqtisadi zərərini 300 milyon dollardan çox qiymətləndirir

Tailand hökuməti Kamboca ilə münaqişə nəticəsində dəymiş iqtisadi zərərin 300 milyon dollardan çox olduğunu təxmin edir.

Operativ Media xəbər verir ki, bu barədə baş nazirin müavini və maliyyə naziri Pichai Chunhawachira məlumat verib.

O, ziyanın miqdarının daha da çox ola biləcəyini istisna etməyib. Krallığın hökuməti Kamboca–Tailand sərhədində beş gün davam edən silahlı toqquşmaların nəticələrinin aradan qaldırılması üçün ilkin olaraq 618 milyon dollar ayırmağı planlaşdırır. Bu barədə "Reuters" agentliyi xəbər yayıb.

Kamboca ilə Tailand arasında münasibətlər 2025-ci il mayın 28-də Kambocanın Preah Vihear əyaləti ilə Tailandın Ubon Raçathani əyaləti arasında yerləşən mübahisəli ərazidə Tailand əsgərlərinin Kamboca hərbi mövqeyinə atəş açmasından sonra kəskin şəkildə pisləşib. İyulun 24-də sərhəd bölgələrində, o cümlədən Ta Monthom, Ta Monthauch və Takrabey məbədləri ətrafında silahlı toqquşmalar baş verib. Gərginlik nəticəsində hər iki tərəfdən onlarla insan həlak olub, yüzlərlə insan yaralanıb.