Bakı Media Mərkəzinin istehsalı olan, dörd hissədən ibarət “Tağıyev” bədii filmi növbəti beynəlxalq uğuru ilə diqqət çəkib.

Operativ Media xəbər verir ki, filmdə Hacı Zeynalabdin Tağıyev obrazını canlandıran Xalq artisti Pərviz Məmmədrzayev, “Tağıyev: Neft” filmindəki rolu ilə 5-ci “Korkut Ata” Türk Dünyası Film Festivalında “Ən yaxşı aktyor” nominasiyası üzrə qalib seçilib.

Mükafat Qazaxıstanın Aktau şəhərində keçirilən festivalın təltifetmə mərasimində filmin rejissoru Zaur Qasımlıya təqdim olunub.

Qeyd edək ki, “Korkut Ata” Türk Dünyası Film Festivalı, Azərbaycan, Qazaxıstan, Qırğızıstan, Türkmənistan, Türkiyə və Özbəkistanın milli kino təşkilatlarını bir araya gətirən Beynəlxalq Türk Mədəniyyəti Təşkilatı – TÜRKSOY-un təşəbbüsü ilə keçirilir. Festivalın əsas məqsədi türk dünyasının birliyini gücləndirmək, türk xalqları arasında mədəni əməkdaşlığı inkişaf etdirmək, həmçinin ortaq audiovizual məkan yaradaraq bu məkanda türk xalqlarının inteqrasiyasına töhfə verməkdir.