Fiziki hazırlıq və idman mütəxəssisləri ilə təlim-metodiki toplanış keçirilib

Müdafiə nazirinin təsdiq etdiyi hazırlıq planına uyğun olaraq, Heydər Əliyev adına Hərbi İnstitutda Azərbaycan Ordusunun qoşun (qüvvə) növləri, birlik, birləşmə və xüsusi təyinatlı təhsil müəssisələrinin fiziki hazırlıq və idman mütəxəssisləri ilə təlim-metodiki toplanış keçirilib. 

Müdafiə Nazirliyindən Operativ Media-ya verilən məlumata görə, toplanışda fiziki hazırlıq məşğələlərinin planlaşdırılması, təşkili və keçirilməsi üzrə rəhbəredici sənədlərin tələbləri, həmçinin şəxsi heyətin fiziki hazırlığının yüksəldilməsi ilə bağlı tapşırıqlar iştirakçıların diqqətinə çatdırılıb.

Qoşun növləri üzrə fiziki hazırlığın ümumi vəzifələri və məzmunu ətrafında müzakirələr aparılıb, təkliflər dinlənilib, eləcə də, kütləvi idman tədbirlərinin keçirilməsi metodikası barədə nəzəri və praktiki məlumatlar verilib.

Sonda zabitlərdən məqbullar götürülüb və müvafiq tapşırıqlar verilərək toplanışa yekun vurulub.