Azərbyacan xalçaları Tbilisidə Gürcüstan Milli Muzeyinə hədiyyə olunub
Azərbaycanın birinci xanımı Mehriban Əliyeva aprelin 6-da Tbilisidə Gürcüstan Milli Muzeyində olub. Birinci xanım muzeydə bu ölkənin tarixinin müxtəlif dövrlərinə aid sərgilənən eksponatlarla tanış olub.
Bu barədə Operativ Media-ya “Azərxalça” ASC-dən məlumat verilib.
Bildirilib ki, ekspozisiyalarla tanışlıqdan sonra Mehriban Əliyevanın adından Gürcüstan Milli Muzeyinə “Azərxalça” ASC-nin istehsalı olan beş nadir xalçadan ibarət “Mədəni irsə yeni baxış” adlı kolleksiya hədiyyə edildi.
Xatırladaq ki, “Mədəni irsə yeni baxış” xalça kolleksiyası “Azərxalça” ASC və dünyada məşhur azərbaycanlı dizayner Rüfət İsmayılın təsisçisi olduğu “AFFFAIR” -in birgə əməkdaşlığı nəticəsində ərsəyə gəlib. Kolleksiyaya daxil olan 5 xalça nümunəsinin hər birindən məhdud sayda - cəmi 25 ədəd istehsal olunub. Bu müasir xalça nümunələrinin hərəsindən bir ədəd isə mədəni irsin qorunması, müasirləşməsi və gələcək nəsillərə ötürülməsi məqsədilə Azərbaycan Milli Xalça Muzeyinin daimi kolleksiyasına hədiyyə edilib.
Müasir xalça kolleksiyasının əsas ideyası Azərbaycan xalçasının sönməz sənət mənbəyi, ailə ocağının bəzəyi, interyerə xüsusi enerji verən nadir incəsənət nümunəsi olduğunu göstərməkdir. Qarabağ Zəfərinə həsr olunan, Azərbaycan xalçalarından, xüsusilə də Qarabağ xalçaçılıq məktəbindən ruhlanaraq ərsəyə gələn layihənin məqsədi həm də tarixi ənənələri müasir istiqamətlərdə yaşatmaqdır.
