Flik: "Yamal tarixin ən yaxşı oyunçularından biri olacaq"

"Barselona"nın baş məşqçisi Hansi Flik Çempionlar Liqasının 1/4 final mərhələsinin ilk oyununda "Atletiko"ya məğlubiyyətdən (0:2) sonra hücumçu Lamin Yamalın çıxışını dəyərləndirib.

Operativ Media UEFA-nın rəsmi saytına istinadən Flikin fikirlərini təqdim edir.

"Təbii ki, o da hər kəs kimi məyusdur. Lakin oyuna başladığı andan sona qədər həm hücumda, həm də müdafiədə fantastik işlər gördü. Üç, dörd, hətta beş oyunçunu aldatması heyrətamizdir. Mənim fikrimcə, o, möhtəşəm bir performans sərgiləyir. Onun cəmi 18 yaşı var və ətrafındakı səs-küyü bir qədər azaltmaq lazımdır. O, tarixin ən yaxşı oyunçularından birinə çevriləcək, lakin onu dəstəkləmək çox vacibdir. Azarkeşlər məhz ona, Vinisius Juniora və Pedriyə görə stadiona gəlirlər. Mənim baxış bucağım belədir".

Qeyd edək ki, cavab qarşılaşması bir həftə sonra, aprelin 14-də Madriddəki "Metropolitano" stadionunda keçiriləcək. Oyun Bakı vaxtı ilə saat 23:00-da (Moskva vaxtı ilə 22:00) başlayacaq.