Simeone: "Barselona" PSJ və "Bavariya" ilə birlikdə Avropanın ən yaxşı komandasıdır"

"Barselona" PSJ və "Bavariya" ilə birlikdə Avropanın ən yaxşı komandasıdır"

Operativ Media xəbər verir ki, bunu "Atletiko"nun baş məşqçisi Dieqo Simeone Çempionlar Liqasının 1/4 final mərhələsinin ilk oyununda "Barselona" üzərində qazanılan qələbəni (2:0) şərh edərkən deyib.

"Düşünmürəm ki, mənim rəhbərliyim altında "Atletiko" nə vaxtsa "Kamp Nou"da qalib gəlmiş olsun. Bu, olduqca çətindir.  Yaxşı komanda işi sayəsində oyunun həlledici məqamlarından yararlana bildik. İkinci qol bizə özünəinam verdi, təəssüf ki, hesabı daha da artıra bilmədik. Sizə zərbə sayımızın 30-a çatdığı, lakin qol vura bilmədiyimiz minlərlə oyun haqqında danışa bilərəm. Futbolun gözəlliyi də elə bundadır: hücumları dəqiq sonlandırmaq uğurun açarıdır. Bu gün biz inanılmaz dərəcədə dəqiq idik, halbuki başqa günlərdə belə olmaya bilərdi.

Bilirdik ki, "Barselona" yüksək müdafiə xətti ilə rəqibə çətinlik yarada bilər və bunun üzərində ciddi işləmişdik. Belə vəziyyətlərdə demək olar ki, hər matçda rəqibi qollar və oyun kombinasiyaları ilə "sancırdıq". Çətin idi, çünki onlar çox yaxşı pressinq edərək vaxtınızı alırlar. Nəticə yaxşıdır, lakin belə rəqib çərşənbə axşamı bizi mütləq tər tökməyə məcbur edəcək!" — deyə o, qeyd edib.

Cavab qarşılaşması bir həftə sonra, aprelin 14-də Madriddə, "Metropolitano" stadionunda keçiriləcək. Oyun Bakı vaxtı ilə saat 23:00-da başlayacaq.