KİV: İtaliya millisi 2026-cı il Dünya Kubokuna vəsiqə qazanmaq üçün daha bir şans əldə edə bilər

Beynəlxalq Futbol Federasiyası (FIFA) İran yığmasının 2026-cı il dünya çempionatında iştirakdan imtina edəcəyi təqdirdə, turnir üçün əlavə seçmə mərhələ təşkil edə bilər.

Operativ Media xəbər verir ki, bu barədə "The Athletic" nəşrinə istinadən "RMC Sport" məlumat yayıb.

"The Athletic" xatırladır ki, 2026-cı il dünya çempionatının reqlamentinin 6-cı maddəsinə əsasən, hər hansı bir komanda turnirdə iştirakdan imtina edərsə, FIFA bu məsələ ilə bağlı qərar qəbul etmək və zəruri hesab etdiyi addımları atmaq səlahiyyətinə malikdir. Bu qayda çərçivəsində bir komandanın digəri ilə əvəz olunması qərarı verilə bilər.

Ehtimallar arasında Asiya Futbol Konfederasiyası (AFC) və Avropa Futbol Assosiasiyaları İttifaqına (UEFA) daxil olan yığmalar arasında əlavə seçim turlarının keçirilməsi də var.

Qeyd edək ki, İtaliya millisi pley-off mərhələsində Bosniya və Herseqovinaya məğlub olaraq dünya çempionatına vəsiqə qazana bilməyib. İranın turnirdən kənarda qalacağı təqdirdə İtaliya kimi komandalar üçün yeni şans yarana bilər.