Riçard Almeydadan səmimi etiraf: “Çempionlar Liqası uşaqlıq arzum idi”
“Qarabağ”ın sabiq futbolçusu Riçard Almeyda karyerası və yadda qalan anları ilə bağlı açıqlamalar verib.
Operativ Media xəbər verir ki, braziliyalı yarımmüdafiəçi “Metrópoles” nəşrinə müsahibəsində dünya futbolunun simvolik arenalarında – Roma Olimpiya Stadionu, Riyadh Air Metropolitano və Stamford Bridge stadionlarında çıxış etməyin onun üçün xüsusi məna daşıdığını bildirib.
Almeyda uzun illər formasını geyindiyi Qarabağ FK-dakı karyerasını belə dəyərləndirib:
“Görülən işin qarşılığını almaq və tanınmaq möhtəşəm hissdir. Bu komandada təxminən 14 il keçirdim. Bunun 10 il yarımını mütləq əsas heyət oyunçusu kimi, qalan hissəsini isə məşqçinin etimadını qazanaraq gah əsas heyətdə, gah da ehtiyat oyunçu kimi çıxış etdim. Həm meydanda, həm də meydan kənarında klubun liderlərindən biri olmuşam. Oynamadığım vaxtlarda belə, paltardəyişmə otağında komanda yoldaşlarıma dəstək olaraq töhfə verməyə çalışırdım”.
Təcrübəli futbolçu uşaqlıq arzularının gerçəkləşdiyini də vurğulayıb:
“Futbol belədir. Allaha şükürlər olsun ki, çox çalışdım və hər şey yolunda getdi. Hisslərim sözlə ifadə olunmazdır. Gənc olanda atamla UEFA Çempionlar Liqası-nı izlədiyimi və bu turnirdə oynamaq istədiyimi dediyimi xatırlayıram. Tanrıya şükür ki, buna nail oldum. Qrup mərhələsində bir dəfə oynasaq da, təxminən altı dəfə pley-off mərhələsinə qədər yüksəlmişdik; hər dəfə qrup mərhələsinin bir addımlığından qayıdırdıq”.
