İranın xarici işlər nazirliyinin sözcüsü Nasir Kənani İsrailin müdafiə naziri Yoav Qallantın Bakıya səfər etməsinə münasibət bildirib. O deyib ki, müsəlman ölkələrinin başçıları İsrailin öz maraqlarını güddüynə diqqət yetirməlidir.
Məsələ ilə bağlı YAP Binəqədi rayon təşkilatının Binəqədi rayonu, Baksol yolu 89 ünvanında yerləşən “Unity Company” ərazi partiya təşkilatının sədri Fikrət Əliyev “Operativ Media”ya açıqlama verib.
“İranın bu cür açıqlamaları Azərbaycanla münasibətlərin normallaşma prosesinə zərbə vurur.
Çünki suveren Azərbaycan dövləti hansısa ölkənin rəsmisinin İrana səfərini şərh etmir. Bu, sadə diplomatiya qaydalarıdır və İranın XİN rəsmisinin də bu cür ibtidai və emosional reaksiyaları başadüşülən deyil. Bir müddət əvvəl İranın xarici işlər nazirinin Azərbaycana səfəri də İsrail XİN tərəfindən şərh edilməmişdi. Çünki normalda belə olmalıdır.
Ayrıca qeyd etmək lazımdır ki, İsrailin müdafiə naziri Azərbaycanda jurnalistlər qarşısında və ya keçirdiyi görüşlərdə İran əleyhinə heç bir açıqlama verməyib. Beləliklə bu və ya başqa ölkənin rəsmilərinin Azərbaycana səfəri zamanı xüsusilə İranın adı belə çəkilmirsə, bu səfəri şərh etmək İranın həddinə deyil.
İsrailin müdafiə nazirinin səfəri Azərbaycan və İsrail arasındakı ikitərəfli münasibətlərə əsaslanıb və görüşlərdə də ikitərəfli münasibətlərin inkişafı müzakirə edilib.
Azərbaycan dəfələrlə vurğulayıb ki, İsrail – Azərbaycan dostluğu üçüncü ölkələrə qarşı yönəlməyib.
İran hər dəfə İsrail və Azərbaycan dostluğundan mənfi mənalar çıxarmağa çalışır və bunun nəticələri də heç vaxt İran üçün müsbət olmur”.