HƏMAS: İsrailin Qəzzaya hücumları nəticəsində 70 girov ölüb

İsrail hərbçilərinin Fələstin anklavının ərazilərinə hücumları nəticəsində Qəzza zolağında radikal qruplaşmaların saxladığı ən azı 70 girov öldürülüb. 

"Operativ Media" xəbər verir ki, bu açıqlama ilə Fələstinin HƏMAS hərəkatının silahlı qanadı - İzzəddin əl-Qəssam Briqadaları qruplaşmasının nümayəndəsi Əbu Ubeydə çıxış edib.

"Biz təsdiq edirik ki, İsrail ordusunun Qəzza zolağındakı hərəkətləri nəticəsində öldürülən girovların sayı 70-i keçə bilər", - Əbu Ubeydə deyib.

Hərəkatın silahlı qanadının nümayəndəsinin sözlərinə görə, HƏMAS tərəfdarları məhbusların həyatını xilas etməyə çalışırdılar, lakin İsrail hakimiyyəti "bu problemdən xilas olmaq üçün girovları qəsdən öldürür". 

O, son bir neçə gündə bombardman nəticəsində yeddi girovun öldürüldüyünü bildirib və onların adlarını daha sonra açıqlayacağına söz verib.

Əbu Ubaida qeyd edib: "Həmas tərəfdarlarının sağ qalan girovlar üçün tələb edəcəyi qiymət bütün girovlar, o cümlədən ölənlər üçün eyni olacaq".