İran və Rusiya Avrasiya regionunda qaz qovşağının yaradılması imkanlarını müzakirə ediblər

Əlcəzairdə keçirilən Qaz İxrac Edən Ölkələr Forumu (GECF) sammiti çərçivəsində İranın neft naziri Cavad Ovci Rusiyanın energetika naziri Nikolay Şulqinov ilə görüşüb və danışıqlar aparıb.

"Operativ Media" xəbər verir ki, bu barədə "Mehr" agentliyi məlumat yayıb. 

Görüş zamanı tərəflər Avrasiya regionunda ŞƏT çərçivəsində qaz qovşağının yaradılması, neft-qaz yataqlarının işlənilməsi, eləcə də mövcud müqavilələrin icrası məsələlərini müzakirə ediblər.

İki ölkə arasında neft və qazın emalı üzrə yeni müqavilələrin imzalanması ilə bağlı da müsbət danışıqlar aparılıb.

Ovci və Şulqinov həmçinin İran və Rusiya arasında elektrik şəbəkələrinin birləşdirilməsi ilə bağlı əldə olunmuş razılaşmaların icrası prosesini müzakirə ediblər.

GECF Sammiti iştirakçı ölkələrin dövlət və hökumət başçılarının iştirak etdiyi illik tədbirdir. O, liderlər üçün bazar tendensiyaları, çağırışlar və imkanlar daxil olmaqla qlobal qaz sənayesi ilə bağlı məsələləri müzakirə etmək üçün platforma təqdim edir. İran 2027-ci ildə GECF sammitini keçirmək niyyətindədir.