Orban Moskvada baş verən terror aktı ilə bağlı Putinə başsağlığı məktubu göndərib

Macarıstanın baş naziri Viktor Orban Rusiya prezidenti Vladimir Putinə Krasnoqorskdakı "Krokus Siti Holl"da törədilən terror aktı ilə bağlı başsağlığı məktubu göndərib və terrorizmə qarşı birgə mübarizəni davam etdirmək niyyətinə dair təminat verib. 

"Operativ Media" xəbər verir ki, bu barədə hökumət başçısının mətbuat katibi Bertalan Havaşi məlumat verib.

O qeyd edib ki, baş nazir bu mesajda "Krokus Siti Holl"da törədilən terror aktı ilə əlaqədar prezident Vladimir Putinə və bütün Rusiya vətəndaşlarına başsağlığı verib. 

"Macarıstan terrorizmə qarşı mübarizəyə sadiqdir, buna görə də mən cənab Prezidenti əmin edirəm ki, biz gələcəkdə beynəlxalq antiterror əməliyyatlarının gücləndirilməsinə töhfə verməyə davam edəcəyik. Qurbanlar və onların ailələri üçün dua edirik", - Baş nazir yekunlaşdırıb.

Rusiyanın Macarıstandakı səfirliyi "Telegram" kanalında bu çətin anda səmimi dəstək sözlərinə görə Macarıstan rəhbərliyinə təşəkkür edib.