Uşaq əyləncə mərkəzlərində qiymətlər neçəyədir?

İstirahət günlərində xüsusilə valideynlər uşaqlarının vaxtını səmərəli keçirmək üçün uşaq-əyləncə mərkəzlərinə üz tuturlar. Bu sektor gəlirli sahə olduğundan paytaxda belə mərkəzlərin sayı da kifayət qədərdir. Bəs qiymətlər necədir?

“Operativ Media” paytaxtdakı uşaq-əyləncə mərkəzlərinin qiymətini araşdırıb.

Belə məkanlarda qiymətlər xidmətlərdən və yaş qrupundan asılı olaraq dəyişir. Valideyn 1 uşağın 1 saatlıq əylənməsi üçün ən azı 6-8, daha yaxşı istirahəti üçün isə 25-30 manatından keçməlidir. Əgər bura yemək və digər xidmətlər əlavə edilərsə, bu məbləğ daha da artar.

Paytaxtdakı parklarda olan atraksionların qiyməti 1 manatdan başlayır. Bir çox atraksionun qiyməti 2-5 manat, “VR Box” və güzgülü ev kimi oyun məkanlarına giriş isə 10 manatdır.

Bakıdakı ticarət mərkəzlərində olan əyləncə yerlərini qiyməti isə nisbətən bahadır. Qiymətlər 20-35 manat arası dəyişir.