Rusiya XİN: Moskva və Bişkek terror təhdidlərinə qarşı birgə mübarizə aparmağa hazırdır

Moskva və Bişkek Mərkəzi Asiyada təhlükəsizliyin qorunmasında regional qüvvələrin preroqativliyini təsdiqləyir, həmçinin terrorizmin transsərhəd təhdidlərinə qarşı birgə mübarizə aparmaq əzmində olduqlarını bildirirlər.

"Operativ Media" xəbər verir ki, bu barədə Rusiya Xarici İşlər Nazirliyinin Bişkekdə XİN-lərarası ikitərəfli məsləhətləşmələrin yekunlarına dair dərc olunmuş məlumatında deyilir. 

"Mərkəzi Asiya və qonşu regionlardakı hazırkı vəziyyətlə bağlı ətraflı fikir mübadiləsi zamanı tərəflər Avropadakı vəziyyəti də müzakirə ediblər. İkitərəfli və beynəlxalq gündəlikdəki aktual məsələlərə toxunulub. Sabitliyin və təhlükəsizliyin qorunmasında regional qüvvələrin müstəsna əhəmiyyəti qeyd olunub. Mərkəzi Asiyada və transsərhəd təhdidlərə birgə mübarizə aparmaq əzmi vurğulanıb, o cümlədən radikalizm və terrorizm, narkotik vasitələrin istehsalı və qeyri-qanuni dövriyyəsi barədə fikir mübadiləsi aparılıb", - nazirlikdən bildirilib.

Tərəflər həmçinin regional və Avropa təhlükəsizlik məsələləri üzrə sıx dialoqu davam etdirmək niyyətlərini təsdiqləyiblər.

Nazirlikdən verilən məlumata görə, Rusiya tərəfi ilə məsləhətləşmələri Rusiya Federasiyası xarici işlər nazirinin müavini Aleksandr Qruşko aparıb. Qırğızıstan tərəfini Qırğızıstanın xarici işlər nazirinin müavini Aybek Moldoqaziyev, eləcə də nazirin birinci müavini Asein İsaev təmsil edib. Qeyd olunur ki, Bişkekdə olarkən Qruşko ATƏT-in proqram ofisinin fəaliyyəti ilə tanış olub, Rusiyanın Kant aviabazasına baş çəkib.