Dərs ilinin sona yaxınlaşması ilə bərabər internetdə tələbələrə ödənişli referat, diplom işi, eləcə də dissertasiya yazmağı təklif edən elanlar da artıb. Beləcə, tələbənin yazmalı olduğu elmi işlər artıq biznesə çevrilib.
Mövzu ilə bağlı “Operativ Media”ya açıqlama verən təhsil məsələləri üzrə ekspert Rəşad Qardaşov deyir ki, əvvəllər açıq şəkildə bu işləri görən hətta kurslar fəaliyyət göstərirdi. İndi isə bütün işlər onlayn həll edilir. Ona görə də bu işlə məşğul olanlar artıb.
“Tələbədən tələb olunan öyrəndiklərinə uyğun olmalıdır. Onlar gələcəyin mütəxəsisləri olacaq. Sadəcə düşünürlər ki, kurs işi olsun, diplom işi olsun onlara lazım olmayacaq. Çünki mövzular müasir əmək bazarı ilə uyğun deyil. Unversitetlərdə kurs işi eləcə də daha böyük elmi işləri pulla yazıb kiməsə təqdim edənlər təkcə bunu gəlir mənbəyinə çevirmir, eləcə də gəncləri plagiata sövq edirlər. Ancaq fikrimcə, belə hallara qarşı mübarizə aparılmalı bu saxta elanların sahibləri cəzalandırılmalıdır. Çünki tələbələrə bu elanlar plagiatı aşılayır”, - ekspert həyacan təbili çalıb.
Rəşad Qardaşov deyir ki, universitetlərdə belə şəxsləri plagiata sövq edən müəllimlər də var. Hətta bəzən plagiat elmi işlər içərisində dissertasiyalar da olur. Mütəxəssis bildirir ki, belə halların geniş yayılmasına səbəb bu cür qanunsuz fəaliyyətə qarşı mübarizə mexanizminin olmamasıdır:
"Universitetlərdə 3-4 müəllim tapılar ki, onlar bu işlə məşğuldurlar. Tələbələrin etməli olduğu tapşırıqları pul qarşılığında hazırlayanlar ona görə çoxalıblar ki, qanunda onlara qarşı ciddi cəza tədbirləri görülmür, hansısa ciddi bir cəza nəzərdə tutulmayıb. Kurs işi, eləcə də digər elmi işlər hər bir gəncin gələcək elmi fəaliyyətinin keyfiyyətini müəyyən edəcək uğurlardır. Buna görə elmi işləri plagiat üsulu ilə yazmağa cəhd edənlər gələcəkdə karyeralarında da ciddi çətinlik və uğursuzluğa düçar ola bilərlər”.
