BMT: Ukraynanın ərazi bütövlüyü çərçivəsində sülhün bərqərar olmasını istəyirik

BMT-nin baş katibi Antonio Quterreş Ukraynada münaqişənin ərazi bütövlüyü prinsipinə riayət etməklə bitməsini istəyir. Belə ki, dünya təşkilatının rəhbərinin rəsmi nümayəndəsi Stefan Düjarrik ABŞ-ın keçmiş prezidenti Donald Trampın yenidən prezident seçiləcəyi təqdirdə, münaqişəyə son qoymaq üçün Kiyevdən ərazi güzəştləri istəyəcəyi ilə bağlı yayılan xəbərlərə münasibət bildirib.

"Operativ Media" xəbər verir ki, Düjarrik deyib:

"BMT-nin baş katibi BMT-nin müvafiq qətnamələri əsasında və Ukraynanın ərazi bütövlüyünə hörmət etməklə münaqişənin sonunu görmək istəyir".

Aprelin 7-də "The Washington Post" öz mənbələrinə istinadən yazıb ki, Tramp qarşıdan gələn prezident seçkilərində qalib gəlsə, münaqişəyə son qoymaq üçün Ukraynadan ərazi güzəştləri əldə etmək niyyətindədir. Nəşrin mənbələrinə görə, Trampın təklifi Ukraynanı Krımı və Donbass sərhəd bölgəsini Rusiyaya verməyə məcbur etməkdir. 

Tramp bundan əvvəl bəyan etmişdi ki, ABŞ prezident seçkilərində qalib gəlsə, Ukraynadakı münaqişəni 24 saat ərzində dayandıra bilər. O, Kiyevin ərazi güzəştlərinə getməli olacağını istisna etməyib.

Siyasətçinin seçki qərargahının müşaviri Ceyson Miller daha sonra mətbuatda bu mövzuda yayılan xəbərlərin həqiqətə uyğun olmadığını bildirib.