Etirazçılar Gürcüstan hakimiyyətinə bir saat vaxt veriblər

Tbilisidə parlament binası yaxınlığında toplaşan etirazçılar Gürcüstan hakimiyyətinə xarici agentlərlə bağlı qanun layihəsini geri götürmək üçün bir saat vaxt veriblər. 

"Operativ Media" xəbər verir ki, etirazçıların mesajlarını şair Rati Amaqlobeli tribunadan açıqlayıb.

"Biz bir saat ərzində "Gürcü Arzusu"nun gürcü xalqının sarsılmaz iradəsini gördükləri və konstitusiya məkanına qayıtdıqları barədə siyasi bəyanatını gözləyəcəyik", - deyə Amaqlobeli qanun layihəsinin geri götürülməsini gözlədiklərini bildirib.

Çərşənbə günü Tbilisidə vətəndaş cəmiyyətinin nümayəndələri və müxalifət siyasətçiləri xarici agentlər haqqında qanun layihəsinə etiraz etmək üçün yenidən parlament binasına toplaşıblar. Hələlik mitinqdə sakitlik hökm sürür. Polislə toqquşma yoxdur. Bazar ertəsindən parlament qarşısında aksiyalar keçirilir.

Çərşənbə günü Gürcüstan parlamenti plenar iclasda birinci oxunuşda prezidentin, müxalifətin və Qərb diplomatlarının etirazına səbəb olan xarici agentlər haqqında qanun layihəsini təsdiqləyib.