Bayden: ABŞ Senatı Ukraynaya yardım haqqında qanun layihəsini ən qısa müddətdə təsdiqləməlidir

ABŞ-nin mümkün qədər tez Ukraynaya silah göndərməsi üçün Senat Ukraynaya yardım haqqında qanun layihəsini tez bir zamanda təsdiq etməlidir.

"Operativ Media" xəbər verir ki, bu barədə ABŞ Prezidenti Cozef Baydenin yazılı bəyanatında bildirilib.

“Senatı tez bir zamanda bu paketi masama göndərməyə çağırıram ki, mən onu imzalaya bilim və biz onların təcili döyüş meydanındakı ehtiyaclarını ödəmək üçün Ukraynaya silah və texnika göndərə bilək”, – Amerika lideri qeyd edib. 

Xatırladaq ki, ABŞ Konqresinin Nümayəndələr Palatası Ukraynaya yardım üçün 61 milyard dolların ayrılmasını təsdiqləyib. Daha sonra qanun layihəsi əksəriyyətin Ukraynaya yardımı dəstəklədiyi Senata ötürüləcək.