İran heç vaxt Rusiya və Ukrayna konfliktinin bir hissəsi olmayıb

İran heç vaxt Rusiya və Ukrayna arasındakı konfliktin bir hissəsi olmayıb.

"Operativ Media" xəbər verir ki, bunu İranın Xarici İşlər Nazirliyinin mətbuat katibi Nasir Kənani İranın Rusiyaya ballistik raketlər göndərməsinə dair verilən sorğuya cavab olaraq bildirib.

Onun sözlərinə görə, İran müharibəyə qarşı olduğunu bildirməklə yanaşı Rusiya və Ukrayna arasında anlaşılmazlıqların həll olunması və hərbi qarşıdurmalara son qoyulması üçün diplomatik həll yolunu dəstəkləyir.

Kənani bildirib ki, İran Ukrayna böhranının əvvəlindən hərbi qarşıdurmanın bir hissəsi olmayıb və onun davam etməsini istəməyib.

“Ukrayna böhranı ilə əlaqədar İranın elan olunan prinsipial siyasəti dəyişilməz olaraq qalıb. Rusiyaya ballistik raketlərin göndərilməsinə dair iddianın təkrarlanması bəzi Qərb ölkələrinin siyasi məqsədləri əsasında baş verir və tamamilə əsassızdır”, - deyə o qeyd edib.

İran XİN rəsmisi qeyd edib ki, İran və Rusiyanın normal hərbi əməkdaşlığı Ukrayna müharibəsinin başlanmasından daha uzun tarixə sahibdir. Bu əməkdaşlıq ikitərəfli anlaşma, beynəlxalq hüquq və normalara əsaslanır və Ukrayna böhranı ilə əlaqəsi yoxdur.