Azərbaycan və Türkiyənin ortaq mədəni irsi ilə dəyərlərinin yaşadılması müzakirə edilib

Azərbaycan və Türkiyənin ortaq mədəni irsinin, dəyərlərinin təbliği və gələcək nəsillərə ötürülməsi müzakirə olunub.

Operativ Media xəbər verir ki, bu məsələ bağlı Dini Qurumlarla İş üzrə Dövlət Komitəsinin sədri Ramin Məmmədovun rəhbərlik etdiyi nümayəndə heyətinin Türkiyəyə səfəri çərçivəsində İğdırda yerləşən "Hacı Yusif Həcər" və "Ulu" məscidlərini ziyarəti zamanı dəyərləndirilib.

Nümayəndə heyətinə məscidlər barədə məlumat verilib. Bildirilib ki, İğdırda müxtəlif etnik qrupların məskunlaşması şəhərin mədəni irsinin zənginləşməsinə səbəb olub və bu fakt xüsusilə, tarixi məscidlərdə özünü göstərir.

Qeyd edilib ki, İğdırdakı tarixi məscidlər böyük memarlıq əhəmiyyətinə malikdir. Tarixi məscidlər təkcə dini tikili kimi deyil, həm də ictimai həyatı istiqamətləndirən elementlər kimi fəaliyyət göstərir. Bölgədəki ən məşhur nümunələrdən biri də "Ulu" məsciddir.

Ziyarətlər zamanı dövlət tərəfindən Azərbaycanda dini ibadətgahlara göstərilən xüsusi diqqət və ehtiramdan bəhs olunub.

Azərbaycan nümayəndə heyəti tərəfindən İğdır məscidlərinə "Qurani-Kərim" və digər dini ədəbiyyatlar hədiyyə edilib.