Media qurumlarının məruz qaldığı hücumlar içində ilk yerdə fişinq hücumları dayanır - ETX

"İnformasiya mübadiləsinin sürətlənməsi, medianı kiberhücumların əsas məkanına çevrib".

Operativ Media xəbər verir ki, bu sözləri Media subyektləri üçün Kibertəhlukəsizlik təlimində Elektron Təhlükəsizlik Xidmətinin Kibertəhlükəsizliyin idarə edilməsi sektorunun aparıcı məsləhətçisi Sənan Vəlizadə deyib.

O, həmçinin təlimdə informasiya mübadiləsinin sürətlənməsinin yarada biləcəyi ictimai, sosial və siyasi risklərdən bəhs edib.

O, bildirib ki, media qurumlarının məruz qaldığı hücumlar içində ilk yerdə fişinq hücumları dayanır:

“Fişinq hücumların 80-90%-i “initial access” dediyimiz ilkin başlanğıc fişinq hücumları nəticəsində olur. İnsan faktoru və ani bir diqqətsizlik böyük bir media orqanının infrastrukturunun sıradan çıxmasına gətirir. Digər sırada sosial media hesablarının ələ keçirilməsi gəlir. Biz bu hal ilə də çox rastlaşmışıq. Bir çox media subyektinin sosial media hesabları ələ keçirilir və orda yanlış xəbərlər yayılır. Sonrakı sırada DDoS hücumları gəlir. Bu daha çox xidmətin dayandırılması hücumudur. Burda qəsdli şəkildə həmin subyektin fəaliyyətinin dayandırılması hədəflənir. Sonrakı sırada məlumat sızmaları var ki, bəzi media qurumlarında təhlükəsizlik tədbirlərinə riayət edilmədiyinə görə məlumatlar əvvəlcədən sızdırılır”