Tramp: Qəzza planının birinci mərhələsi gələn həftə ərzində tamamlana bilər

ABŞ prezidenti Donald Tramp Qəzza zolağında vəziyyətin nizamlanmasına dair planın birinci mərhələsinin gələn həftə ərzində tamamlana biləcəyini açıqlayıb.

Operativ Media xəbər verir ki, o, bu barədə məlumatı "Truth Social" sosial media platformasında paylaşıb.

“Bu həftə sonu girovların azad edilməsi, Qəzzada müharibənin dayandırılması, lakin ən əsası, nəhayət, Yaxın Şərqdə çoxdan gözlənilən sülhün bərqərar olunması ilə bağlı HƏMAS və dünya ölkələri ilə çox müsbət müzakirələr aparılır. Bu danışıqlar uğurla davam edir və sürətlə irəliləyir”, – deyə ABŞ prezidenti bildirib.

Tramp əlavə edib ki, işçi qruplar sentyabrın 6-da yekun detalları hazırlamaq üçün Misirdə görüşəcəklər.

“Mənə birinci mərhələnin bu həftə ərzində həyata keçiriləcəyini deyirlər və mən hamıdan tez hərəkətə keçmələrini xahiş edirəm”, – deyə Tramp qeyd edib. Onun sözlərinə görə, gecikmə “heç kəsin istəmədiyi böyük qan gölünə” səbəb ola bilər.

Xatırladaq ki, sentyabrın 29-da Ağ Ev Trampın Qəzza zolağında nizamlanmaya dair “hərtərəfli planını” açıqlayıb. 20 bənddən ibarət olan bu sənəd, digər məsələlərlə yanaşı, Fələstin anklavında müvəqqəti xarici idarəetmənin tətbiqini və orada beynəlxalq sabitlik qüvvələrinin yerləşdirilməsini nəzərdə tutur. İsrail artıq planla razılaşdığını bəyan edib.