"Mançester Yunayted" "Barselona"nın müdafiəçisi Balde ilə maraqlanır

İngiltərənin "Mançester Yunayted" klubu "Barselona"nın müdafiəçisi Alexandro Baldeni heyətinə qatmaq niyyətindədir.

​Operativ Media ESPN-ə istinadən xəbər verir ki, kataloniya təmsilçisinin baş məşqçisi Hans-Diter Flik transfer məsələsinə aydınlıq gətirməzdən əvvəl 22 yaşlı ispaniyalı futbolçu ilə şəxsən görüşməyi planlaşdırır. Cari mövsümdəki gələcəyi ilə bağlı əminlik əldə etmək istəyən müdafiəçi 2026/27 illər dönəmindəki perspektivləri barədə dəqiq təminat tələb edir.

​Klub oyunçunun gedişinə icazə verəcəyi və futbolçunun "Old Trafford"a keçməkdə maraqlı olacağı təqdirdə, "qırmızı şeytanlar" əvvəlcə satınalma hüququ ilə birillik icarə müqaviləsi üzrə danışıqlar aparmağa üstünlük verəcək. "Barselona"nın idman hüquqlarını 30-40 milyon avro dəyərində qiymətləndirdiyi idmançının "Transfermarkt" portalındakı bazar dəyəri 50 milyon avrodur.

​Kataloniya klubunun yetirməsi olan və 2022-ci ilin iyulundan əsas komandada çıxış edən müdafiəçi 2025/26 mövsümündə keçirdiyi 42 matçda 3 məhsuldar ötürmə ilə yadda qalıb. Onun "Barselona" ilə qüvvədə olan müqaviləsinin müddəti 2028-ci il iyunun 30-dək nəzərdə tutulub.