Yaponiya BMT Nizamnaməsindəki “düşmən dövlətlər” ifadəsinin çıxarılmasını istəyir

Yaponiyanın Baş naziri Sanae Takaichi BMT Nizamnaməsindən “düşmən dövlətlər” ifadəsinin çıxarılmasının vacibliyini bildirib.

Operativ Media xəbər verir ki, Takaichi bunu BMT Baş Assambleyasının 81-ci sessiyasında çıxışı zamanı deyib.

O qeyd edib ki, 2005-ci ildə BMT-nin Ümumdünya Sammitinin yekunlarına əsasən “düşmən dövlətlər” ifadəsinin BMT Nizamnaməsindən çıxarılması ilə bağlı qətnamə qəbul edilib. Baş nazir həmin qərara uyğun olaraq ifadənin sənəddən çıxarılmalı olduğunu vurğulayıb.

Takaichi həmçinin Yaponiyanın son 70 il ərzində BMT-nin fəaliyyətinə, sülh və rifahın təşviqinə verdiyi töhfələrlə fəxr etdiyini bildirib.

“Düşmən dövlət” ifadəsi BMT Nizamnaməsinin 53-cü maddəsində yer alır. Sənəddə bu anlayış İkinci Dünya müharibəsi zamanı Nizamnaməni imzalayan dövlətlərdən hər hansı birinin düşməni olmuş ölkələrə aid edilir.

Rusiya xarici işlər naziri Sergey Lavrov daha əvvəl bildirib ki, BMT Nizamnaməsi İkinci Dünya müharibəsinin nəticələrini təsbit edir. O, Yaponiyanın sənəddə əvvəlcə “düşmən dövlət” kimi qeyd edildiyini və ölkənin BMT-yə üzv olarkən Nizamnamənin prinsiplərini tam şəkildə qəbul etdiyini vurğulayıb.

Çin Xarici İşlər Nazirliyinin rəsmi nümayəndəsi Lin Cian isə Lavrovun fikirlərini dəstəklədiyini bildirib. Onun sözlərinə görə, Yaponiyanın BMT Nizamnaməsində “düşmən dövlətlər” sırasında yer alması faktı unudulmamalıdır.