AQEM-in Baş katibi Azərbaycanın təşəbbüsünü yüksək qiymətləndirib

CICA çərçivəsində ilk dəfə belə bir toplantının keçirilməsi regional dialoqa dəyərli töhfədir. İlk növbədə, CICA Media Forumunun keçirilməsi təşəbbüsü ilə çıxış edən Azərbaycan Respublikasının Prezidenti İlham Əliyevə minnətdarlığımı bildirirəm.

Operativ Media xəbər verir ki, bunu Media və Yayım Şurasının təşkilatçılığı ilə keçirilən “CICA Media Forum”da AQEM-in Baş katibi, səfir Kayrat Sarıbay bildirib.

O qeyd edib ki, CICA çərçivəsində ilk Media Forumunun açılışında çıxış etmək onun üçün böyük şərəfdir.

Səfir bildirib ki, bu təşəbbüs Prezident İlham Əliyevin beynəlxalq əməkdaşlığa dair geniş baxışını əks etdirir. Onun sözlərinə görə, bu baxış açıqlıq və dialoq prinsiplərinə, eləcə də dövlətlər arasında etimadın və qarşılıqlı anlaşmanın möhkəmləndirilməsində medianın mühüm rolunun tanınmasına əsaslanır.

Kayrat Sarıbay qeyd edib ki, Bakıya hər səfər əməkdaşlığın daha da inkişaf etdirilməsi üçün yeni imkanlar yaradır.

O bildirib ki, müntəzəm görüşlər CICA çərçivəsində Azərbaycanın sədrliyinin fəal və səmərəli yanaşmasını nümayiş etdirir və təşkilatın fəaliyyətinin davamlı inkişafına xidmət edir.

Səfirin sözlərinə görə, regional etimadın gücləndirilməsi istiqamətində praktiki nəticələr əldə etmək üçün cəmiyyətin aydın şəkildə məlumatlandırılması vacibdir. Bu baxımdan, media nümayəndələrinin belə bir toplantıda bir araya gəlməsi böyük əhəmiyyət daşıyır.

O qeyd edib ki, geosiyasi gərginliklərin, iqtisadi qeyri-müəyyənliyin və zorakılıq təzyiqlərinin getdikcə daha çox təsir göstərdiyi dünyada rəqəmsal transformasiya cəmiyyətlərin informasiyaya çıxış və ondan istifadə formasını sürətlə dəyişir.

“İnformasiyanın sürətli yayılması bəzən mövcud fikir ayrılıqlarını aradan qaldıra, bəzən isə anlaşılmazlıqları daha da dərinləşdirə bilər.

Narrativlər və onların formalaşdırdığı yanaşmalar beynəlxalq münasibətlərə birbaşa təsir göstərir.

Belə bir şəraitdə açıq və konstruktiv dialoqun aparılması qlobal prioritetə çevrilir.

Bu prioritet yaxın zamanda keçirilmiş BMT Baş Assambleyasının iclasında da açıq şəkildə bir daha təsdiqlənib.

Lakin qlobal məqsədlər regional fəaliyyət tələb edir. Regional səylər BMT-nin fəaliyyətini tamamlayaraq daha geniş, BMT əsaslı sistemin gücləndirilməsinə xidmət edən praktiki və regionun xüsusiyyətlərinə uyğun həllər təqdim edir.

Bu regional həllərin həyata keçirilməsi məhz CICA-nın gördüyü işdir.

28 üzv dövləti bir araya gətirən CICA Asiya boyunca dialoq üçün inklüziv platforma yaradır”.