Yazılış qaydası tez-tez dəyişdirilən sözlər hansılardır?

“Lüğətdə sözlərin tez-tez dəyişdirilməsi insanın bildiyinə şübhə yaradır".

Bunu “Operativ Media”ya açıqlamasında “Grammar Azi” feysbuk səhifəsinin təsisçisi Murad Hüseynov bildirib.

Onun sözlərinə görə, bəzi sözlər var ki, yazılış qaydası lüğətdə bir neçə dəfə dəyişdirilib:

“Lüğətimizdə bir sıra sözlər var ki, yazılış forması dəyişdirilib. Məsələn “ismarıc”, indi “ismarış” olub. “Perfomans”, indi “performans” olub. “Apelyasiya” sözündə əvvəl iki “l” hərfi var idi, sonra bir “l” hərfi ilə oldu, sonra yenə dəyişdirib iki “l” hərfi ilə etdilər”.

 Murad Hüseynov bildirib ki, sözlərin tez-tez dəyişdirilməsi xoşagələn hal deyil:

“Sosial şəbəkələrdəki müzakirələrdə, cəmiyyətin fikri ortaya çıxır. Lüğət müəllifləri də düşünürəm ki, o fikri nəzərə alıb, insanların daha çox öyrəşdiyi varianta doğru dəyişirlər. Məsələn “performans” sözünün özü əvvəllər “perfomans” idi. Amma insanlar “performans” kimi işlədirdilər deyə bu formada dəyişdilər. Əvvəllər “Pitsa” yazılırdı, indi “Pizza” yazılır. “Məbadə” sözü “nəbadə” olaraq dəyişdirildi. Sözlərin insanların daha çox işlətdiyi formada dəyişdirilməsi istifadə üçün rahatdır. Lakin bəzən insan bildiyinə şübhə ilə yanaşır".