Aİ-95 oktan benzin tələb edən avtomobillərin sürücüləri necə qənaət edə bilər?

“Son zamanlar ölkəyə gətirilən avtomobillərin böyük əksəriyyəti Aİ-95 oktanlı benzin tələb edir. Bu isə sürücülərin aylıq avtomobil xərcində əsaslı şəkildə fərq edir”.

Bu sözləri “Operativ Media”ya açıqlamasında avtomobil ustası Dəniz Ağabəyli deyib. Dəniz Ağabəylinin sözlərinə görə, ölkəyə istehsal ili 10 ildən artıq avtomobillər gətirilmədiyindən ancaq yeni avtomobillər gətirmək olur. Bu avtomobillər isə yüksək oktanlı yanacaq tələb edir. “Azərbaycana Amerikadan gətirilən eləcə də, Avropadan gəririlən avtomobillərin demək olar ki, hamısı Aİ-95 oktanlı yanacaq tələb edir. Bu avtomobillərin üzərində yüksək təzyiqli mühərrik olduğundan Aİ-92 markalı benzinlə işləmir. Əgər sürücü Aİ-92 oktanlı benzinlə avtomobili idarə etsə, avtomobilin farsunkaları sıradan çıxacaq. Bəzi sürücülər var ki, qənaət etmək üçün Aİ-92 oktanlı yanacaqla avtomobil idarə edir, lakin sonra daha çox xərcə düşür”. 

Dəniz Ağabəyli deyir ki, sürücülər qənaət etmək üçün bir sıra üsullardan istifadə edə bilər. 

“Bəzi sürücülər avtomobilin beyninə əlavə proqram yazaraq onu “Avro-5”dən, “Avro-4”ə keçirtmək istəyirlər. Lakin bu da effektiv üsul deyil. Aİ-95-lə Aİ-92 ni qarışdıran sürücülər də var. Belə olduqda yanacağın oktanı nisbətən qalxsa da, yenə də istehsalçı zavodun tələbini ödəmir. Sürücülərə tövsiyyəm odur ki, istehsalçı zavodun tələbi nədirsə, o oktanlı yanacaq istifadə etsinlər. Digər bir çıxış yolu isə oktan artıran qatqılardan istifadə edə bilərlər. Keyfiyyətli oktan artırıcı istehsalçı zavodun tələbini əvəz edə bilər”.