Son zamanlar insanlar arasında qəzəb və aqressiya hallarının, bir-birilərinə qarşı dözümsüzlük hissinin çoxaldığını müşahidə etmək çətin deyil. Hətta vəziyyət elə bir mərhələyə çatıb ki, insanlar artıq ünsiyyət qurmaqdan belə qaçınırlar.

Bəs aqressiyaya səbəb olan faktorlar hansılardır və problemin həlli yolu nədir?

Bu barədə psixoloq Ülviyyə Murtuzova “Operativ Media”ya açıqlamasında bildirib ki, aqressiya sonradan yaranan duyğularımızdan biridir:

“Gündəlik həyat tərzi və xüsusilə də sosial durum birbaşa insanda aqressiya yaradır. Uşaqlarda bu, ilkin dönəmlərdə valideynlərin ona qarşı münasibətindən qaynaqlanır".

O, qeyd edib ki, yetkinlik, gənclik və sonrakı yaşlılıq dönəmindəki aqressiya isə baş vermiş ətraf sferadakı hadisələr, cəmiyyətdə bizə qarşı olan münasibətlər, özümüzün daxili əsəbimizin yetərincə çox olması, əldə etdiyimiz uğurların bizi qane etməməsi, uğursuzluq, çarəsizlik, düşdüyümüz situasiyadan çıxa bilməmək, imkanlarımızı itirmək kimi səbəblərdən yaranır.